|
|
| Ururka Qoraaga Somaliland: Canbaarayn qabashada suxufiyiinta Haatuf | |||
| 4 Jan 2007 | |||
|
Ururka Qoraaga Somaliland, wuxuu aad iyo aad
uga xunyahay xadhiga aan xeerka dalka loo marin, ee lagu xidhay
maamulkii wargeyska madaxa bannaan ee Haatuf. Waa nasiib darro in ay soo
noqnoqoto foolxumada xadhigga noocan oo kale ah. Waxay wax weyn u
dhimaysaa kalsoonida saxaafadda dalka, waxay diciifinaysaa ra'yiga
dadweynaha. Xadhiga noocan ahi wuxuu dhaawac u geysanayaa xorriyadda
saxaafadda iyo geedi socodka wada-tashiga.
Haddii maamulka wargeyska lagu hayo meel-kadhac iyo denbi uu galay oo ka baxsan xeerka saxaafadda u yaalla, waa in loo maraa qaabka loogu talo galay in muwaadinka loo maro, marka uu denbi geysto. Qaabka qafaalashada iyo xoogga loo adeegsado muwaadiniinta, waa mid noqonaya qalad in lagu saxo qalad. Sida xeerarka dalka u yaallaa dhigayaan, waa in loo maraa jidka toosan ee dalka loo dejiyey. Mana jiro qof xeerka gacmaha ku sita oo siduu doono ka yeelaya. Ugu danbayn Ururka Qoraaga Somaliland wuxuu ugu baaqayaa hay'adaha dawliga ah ee arrinkani khuseeyo inay si degdeg ah wax uga qabtaan. Ururka Qoraaga Somaliland, waa urur ku bahoobay qalinka iyo qoraalka. Mana taageersana in qalinka loo adeegsado xumaan. Mana taageersana ciddii jebisa xeerka saxaafadda dalka u yaalla. Ururka Qoraaga Somaliland / Somaliland Writers Association Guddoomiye: Cabdiraxmaan Xaashi Sweden
|
|||
|
Copyright © 2001-2007 Hargeysa Online , All Rights Reserved |
|||
|
contact@hargeysa.org |
boggahargeysa@yahoo.se |
||
|
|
|||